CBE YAWAKUMBUKA WAMACHINGA, YAENDESHA UTAFITI KUWASAIDIA KUTAMBULIWA RASMI.

Mkuu wa Chuo cha Elimu ya Biashara Dar es salaam  Prof. Emanuel Mjema  akitoa ufafanuzi kuhusu utafiti  wa wafanyabiashara wadogo wadogo (wamachinga) unaofanywa na chuo hicho kwa kushirikiana  na  Shirika la Wafanyabiashara  kutoka nchini  Finland (FBMA)  kwa lengo la kubaini  fursa za biashara zilizopo , faida, changamoto  na mchango wao katika maendeleo ya taifa pindi watakapoingizwa kwenye mfumo rasmi unaotambulika kisheria.

Makamu Mkuu wa Chuo cha Elimu ya Biashara Dar es salaam  Prof.  Simon Msanjila akitoa ufafanuzi kuhusu  mchango wa utafiti  wa shughuli za wafanyabiashara wadogo wadogo (wamachinga) unaofanywa na chuo hicho kwa kushirikiana  na  Shirika la Wafanyabiashara  kutoka nchini  Finland (FBMA) utakavyochangia maendeleo ya sekta ya biashara nchini.

………………………………………………………………………..

Na. Aron Msigwa –MAELEZO.Dar es salaam.

Chuo cha Elimu ya Biashara Dar es salaam (CBE) kwa kushirikiana  na  Shirika la Wafanyabiashara  kutoka nchini  Finland (FBMA)  kinafanya utafiti  wa wafanyabiashara wadogo wadogo (wamachinga) kwa lengo la kubaini  fursa za biashara zilizopo , faida, changamoto  na mchango wao katika maendeleo ya taifa pindi watakapoingizwa kwenye mfumo rasmi unaotambulika kisheria.

Akizungumzia utafiti huo leo jijini Dar es salaam, Mkuu wa Chuo hicho Prof. Emanuel Mjema amesema kuwa kwa kipindi kirefu wafanyabiashara wadogowadogo maarufu kama wamachinga wamekuwa katika malumbano na mamlaka za miji na majiji kote nchini kutokana na kukosa mfumo rasmi unaotambua biashara zao.

Amesema chuo chake kwa kuliona jambo hilo kikishirikiana na Shirika la Wafanyabiashara wa Finland (FBMA) kimeamua kuendesha utafiti huo kuanzia mwaka 2014 na kuongeza  kuwa matokeo ya awali yaliyopatikana ndani ya mwaka mmoja yamebainisha kuwa jiji la Dar es salaam lina wamachinga zaidi ya Laki saba (700,000) wanaofanyabiashara zao nje ya mfumo rasmi unaotambulika kisheria.