BENKI YA STANBIC YABORESHA BIDHAA YAKE INAYOLENGA BIASHARA NDOGO NA ZA KATI

                                                     

Kurahisisha huduma za kibenki kwa biashara ndogo na za kati

Benki ya Stanbic Tanzania imeboresha bidhaa yake ya kibunifu inayolenga wafanyabiashara wadogo na wa kati (SMEs) kwa kuboresha ufanisi wa biashara zao. Benki hii sasa inatoa  huduma bora za kibenki zilizo rahisi na zisizo na usumbufu kupitia bidhaa yake ya Biashara Direct.

Katika taarifa iliyotolewa na benki jijini Dar es Salaam jana, Mkuu wa Kitengo cha Biashara, Farha Mohamed alisema, "tunajivunia kuwapa Watanzania bidhaa yetu bora ya Biashara Direct ambayo inarahisisha mchakato wa kibenki kupitia njia ya kidijitali kwa wafanyabiashara wadogo na wa kati (SMEs), ikiambatana na msaada wa ushauri wa kifedha kwa wafanyabiashara unaotolewa kupitia wabobezi wa biashara waliotengwa mahususi na benki. 

Bidhaa yetu sasa inaruhusu malipo kwa kutumia USSD kwa njia ya simu ya mkononi; ikiwa na chaguo la lugha ya Kiswahili kuruhusu wateja wetu kuchagua lugha waipendayo.’’ Akichanganua juu ya vipengele vya ulinzi na usalama wa bidhaa hiyo, Bi. Mohamed alielezea kuwa malipo ya kupitia USSD yameboreshwa na kwa sasa, huduma hii ina uwezo wa kunukuu na kuhakiki malipo. Muidhinishaji wa malipo anaweza kupokea nukuu ya malipo haya popote alipo na kuweza kuyaidhinisha ili kukamilisha muamala.

Bidhaa hii mahususi kwa ajili ya wafanyabiashara wadogo na wa kati imedhamiria kurahisisha uhamishaji wa fedha, ulipaji wa bili pamoja na kuwawezesha wafanyabiashara hawa kufuatilia miamala kwenye akaunti zao kirahisi - 'tunawezesha mafanikio ya kifedha kwa sekta ya biashara ndogo ndogo na za kati (SME) kupitia Biashara Direct,' Farha aliongeza.

Nchi inapoelekea katika msukumo wa maendeleo ya viwanda, ukuzaji wa sekta ya biashara ndogo na za kati (SME) unaendelea kuwa nguzo muhimu katika kufikia malengo ya Dira ya Maendeleo ya Tanzania kufikia 2025. Kwa hivyo, Benki ya Stanbic imejitoa kufanikisha maendeleo kwa wadau wanaojishughulisha katika biashara ndogo na za kati (SME) kama ilivyodhihirika katika ushindi wake wa tuzo ya The Banker kama 'Benki bora inayowezesha biashara ndogo ndogo na za kati (SME)’ nchini Tanzania iliotolewa hivi karibuni.