TANZANIA NA JAPAN KUANZISHA USHIRIKIANO KATIKA MATUMIZI YA TEHAMA.

Katibu Mkuu wa Wizara ya Ujenzi, Uchukuzi na Mawasiliano Prof. Faustin Kamuzora (kushoto) akizungumza na Mwakilishi Mkuu wa Shirika la Kimataifa la Maendeleo la Japan (JICA) nchini Tanzania Bw. Toshio Nagase kuhusu Japan na Tanzania kushirikiana katika masula ya TEHAMA . Bw. Toshio Nagase amekutana na kufanya mazungumzo na Katibu Mkuu wa Wizara ya Ujenzi, Uchukuzi na Mawasiliano Prof. Faustin Kamuzora leo jijini Dar es salaam.

Katibu Mkuu wa Wizara ya Ujenzi, Uchukuzi na Mawasiliano Prof. Faustin Kamuzora (kushoto) akisisitiza jambo alipokutana na  Mwakilishi Mkuu wa Shirika la Kimataifa la Maendeleo la Japan (JICA) nchini Tanzania Bw. Toshio Nagase. Bw. Toshio Nagase amekutana na kufanya mazungumzo na Katibu Mkuu wa Wizara hiyo kuhusu namna Japan na Tanzania zinavyoweza kushirikiana katika masula ya TEHAMA.

Na. Aron Msigwa - Dar es salaam. 

Tanzania na Japan zinatarajia kuanzisha ushirikiano katika matumizi ya Teknolojia ya Habari na Mawasiliano (TEHAMA) kwa kuwaunganisha wafanyabishara na vijana wanaojihusisha na masuala ya TEHAMA ili waweze kunufaika na fursa zilizopo katika nchi hizo.

Hayo yamebainishwa leo jijini Dar es salaam na Katibu Mkuu wa Wizara ya Ujenzi, Uchukuzi na Mawasiliano Prof. Faustin Kamuzora mara baada ya kukutana na kufanya mazungumzo na Mwakilishi Mkuu wa Shirika la Kimataifa la Maendeleo la Japan (JICA) nchini Tanzania Bw. Toshio Nagase ambaye alimtembelea ofisini kwake kueleza nia ya Shirika lake na nchi ya Japan kutaka kuwekeza kwenye Sekta ya TEHAMA nchini Tanzania.

Amesema mara baada ya kukamilika kwa taratibu zote za ushirikiano katika sekta ya TEHAMA vijana na wafanyabishara wa Tanzania wataweza kushirikiana na vijana na wafanyabiashara kutoka Japan katika kubadilishana uzoefu na ujuzi katika masuala ya TEHAMA na kuwawezesha kujiajiri wenyewe au kuajiriwa ndani na nje ya nchi.