SERIKALI YAJIDHATITI UHIFADHI NA KULINDA KUMBUKUMBU ZA URITHI WA TAIFA

SERIKALI YAJIDHATITI UHIFADHI NA KULINDA KUMBUKUMBU ZA URITHI WA TAIFA

Mkurugenzi wa Mambo ya Kale toka Wizara ya Maliasili na Utalii Bw. Donatius Kamamba(kushoto) akieleza kwa waandishi wa habari(hawapo pichani) kuhusu mikakati ya serikali katika kulinda na kuhifadhi kumbukumbu na urithi wa Taifa, wakati wa mkutano uliofanyika ukumbi wa Idara ya Habari(MAELEZO) leo Jijini Dar es Salaam.Kulia ni Afisa Habari wa Idara ya Habari (MAELEZO) Bi.Fatma Salum.Kaimu Mkuu wa Kitengo cha Mawasiliano toka Wizara ya Maliasili na Utalii Bi. Doreen Makaya(kushoto) akiongea na waandishi wa habari(hawapo pichani) akiwataka kuwaelimisha wananchi umuhimu wa kuzuia ujangili.Kulia ni Mkurugenzi wa Mambo ya Kale toka Wizara Hiyo Bw. Donatius Kamamba.  

WIZARA YA MALIASILI NA UTALII

IDARA YA MAMBO YA KALE 

KUMBUKUMBU NA URITHI WA TAIFA

Wizara, kupitia Idara ya Mambo ya Kale, inao wajibu wa kutambua, kulinda, kutunza na kuhifadhi Kumbukumbu na Urithi wa Taifa na Urithi wa Dunia kwa mujibu wa Sera ya Malikale ya 2008, Sheria ya Mambo ya Kale Sura 333 (R.E 2002) na Mkataba wa Kimataifa wa 1972 wa UNESCO.  Kumbukumbu na Urithi huu unatokana na rasilimali za Utamaduni zinazoshikika na zisizoshika; zinazohamishika na zisizohamishika kama zinavyoainishwa katika Sera ya malikale (2008), Sheria ya Mambo ya Kale, Sura 333.

Wizara, kwa maana ya Idara ya Mambo ya Kale, ili kutekeleza azma hii inao wajibu, kwa kuwashirikisha wamiliki wa Urithi huu, kufanya na kuratibu Utafiti; kutambua umuhimu wa malikale husika kihistoria, kiimani, kisayansi, kisiasa na kiuchumi. Wizara, kupitia Idara ya Mambo ya Kale inalo jukumu la kutambua, kulinda, kutunza, kuhifadhi Kumbukumbu na Urithi wa Taifa na ule wa Dunia kwa mujibu wa Katiba ya nchi (1977); Sera ya Utamaduni 1999; Sera ya Malikale (2008) na Sheria ya Mambo ya Kale, (Sura 333).  Aidha, Serikali ya Tanzania imeridhia mikataba ya Kimataifa ya UNESCO ya mwaka 1954, 1970 na 1972.

Malengo mahususi ya Sera ya Malikale 2008 ni pamoja na kufafanua dhima na majukumu ya  Serikali za mitaa, jamii, watu binafsi, mashirika na asasi mbalimbali katika kuhifadhi na kusimamia malikale; kuweka ufafanuzi sahihi wa kulinda, kusimamia, kutunza, kuhifadhi, kuendesha na kuendeleza malikale; kuweka Kumbukumbu  za Urithi wa Taifa kwa ujumla, na kuainisha namna bora ya kusimamia utafiti na uhifadhi wa malikale.

Sera imeweka bayana kuwa suala la urekebu kuhusu utafiti na uhifadhi wa Urithi wa Taifa utafanywa na Serikali.  Aidha, suala la uhifadhi na uendelezaji malikale linahusisha sekta mbalimbali katika jamii na jamii kwa ujumla.  Wizara kwa kuwashirikisha wadau inakamilisha utaratibu wa kutunga sheria mpya kuhusu malikale ili Sera iweze kutekelezeka.

Kimsingi, Urithi tegemewa (Potential heritage) wa Utamaduni unatengenezwa kila siku kutokana na kazi za binadamu wakati wa kupambana na mazingira ili kukidhi mahitaji yake.  Aidha, kwa msingi huo huo, Urithi tegemewa hutoweka kila siku.  Kwa mujibu wa misingi ya uhifadhi, umri wa miaka 100 na zaidi huonekana kuwa ni kigezo  na ni msingi muhimu.  Hata hivyo,  umri pekee yake hautoshi ni lazima umuhimu wake nao uainishwe na uwekwe bayana.

Wizara hutenda yote hayo kwa ajenda ya kuhakikisha kuwa vielelezo halisi vya chimbuko na maendeleo ya binadamu vinarithishwa kutoka kizazi kimoja kwenda kijazi kingine.