WAOMBA KITUO MAALUMU CHA WATOTO WALEMAVU BUHANGIJA KUSAIDIWA ZAHANATI.

Mratibu Mkazi wa mashirika ya Umoja wa Mataifa na mwakilishi wa Shirika la Maendeleo la Umoja wa Mataifa (UNDP) nchini, Alvaro Rodriguez akisalimiana na Mkuu wa Wilaya ya Shinyanga, Bi. Anne Rose Nyamubi mara baada ya kuwasili ofisini kwake kwa ajili ya mazungumzo kabla ya kuelekea kwenye kituo cha kulelea watoto wenye mahitaji maalum wakiwemo walemavu wa ngozi cha Buhangija Jumuishi kilichopo mkoani Shinyanga.

Na mwandishi wetu, Shinyanga

MKUU wa wilaya ya Shinyanga AnneRose Nyamubi ameomba jamii ya watanzania kusaidia kupatikana kwa zahanati katika kituo cha kulelea watoto walemavu cha Buhangija ili kupunguza adha wanazopata watoto hao katika huduma za afya.

Kauli hiyo ameitoa katika mazungumzo na mwandishi wa habari hizi ambaye alifika katika kituo hicho akiambatana na ujumbe wa Umoja wa Mataifa uliokuwa ukiongozwa na Mratibu Mkazi wa mashirika ya Umoja wa Mataifa na mwakilishi wa Shirika la Maendeleo la Umoja wa Mataifa (UNDP) nchini, Alvaro Rodriguez.

Nyamubi amesema kwamba ingawa hospitali ya mkoa ina dirisha kwa ajili ya matibabu ya watoto hao,wakati mwingine inakuwa shida daktari maalumu anayehusika anapokuwa hayupo. Aidha alisema kwa namna watoto hao walivyo wanahitaji huduma ya karibu ya kitiba ambayo inawezekana kama kituo hicho kingekuwa na zahanati yake.

Mkuu wa Wilaya ya Shinyanga, Bi. Anne Rose Nyamubi akiwa kwenye mazungumzo na Mratibu Mkazi wa mashirika ya Umoja wa Mataifa na mwakilishi wa Shirika la Maendeleo la Umoja wa Mataifa (UNDP) nchini, Alvaro Rodriguez aliyeambatana na Mshauri wa masuala ya haki za binadamu kutoka ofisi kwake, Bi. Chitralekha Massey ( wa pili kulia kwake) pamoja na Mtaalam wa Mahusiano na Mawasiliano wa Umoja wa Mataifa (UN) Tanzania Hoyce Temu (wa pili kushoto). Wengine katika picha ni Afisa Elimu Sayansikimu, Beatrice Mbonea (wa kwa kulia), Afisa Elimu Msingi wa manispaa ya Shinyanga, Bi. Pudensiana Magnus (katikati kulia), Mkurugenzi wa manispaa ya Shinyanga, Festo Kang'ombe pamoja na Msaidizi wa Mkuu wa Mkoa wa Shinyanga, Bw. Shadrack Kengese.

Kituo hicho kilichoanzishwa mwaka 2010 kwa ajili ya watoto walemavu wasiosikia na wasiiona kwa sasa kinapokea watoto wenye alibnizim ambao wanaokabiliwa na ujahiri dhidi ya maisha yao. Kwa mujibu wa mkuu huyo wa wilaya kituo hicho ambacho serikali hutenga bajeti kwa ajili ya wanafunzi 50 wasiosikia na kuona, sasa kina watoto wenye albinism 247 ambao hawako katika bajeti na wanaishi kutokana na misaada ya watu mbalimbali.

Alisema kwamba watoto wenye albinism wanahitaji huduma za tiba za karibu zaidi kutokana na mazingira yanawazunguka na dirisha pekee katika hospitali ya mkoa halitoshi kwani wakati mwingine wanalazimika kukaa kwenye foleni kama wagonjwa wengine na hili halipendezi.

Aidha alisema kituo hicho cha Buhangija kwa sasa ni kidogo kuzingatia na uwingi wa wanaohitaji msaada na hivyo serikali inatafuta eneo jingine kwa ajili ya kujenga kituo.

Mazungumzo yakiendelea ndani ya ofisi za Mkuu wa mkoa wa Shinyanga zinazokaimiwa na Mkuu wa wilaya ya Shinyanga, Bi Anne Rose Nyamubi.

Kufurika kwa watoto hao wenye ulemavu kunatokana na tishio la maisha yao hasa ukanda wa Ziwa ambapo familia zao zimewakimbiza kituoni hapo kwa ajili ya usalama wao. Aidha Mkuu huyo wa wilaya amesema kwamba kituo hicho hakina bajeti na kutaka wasamaria wema kuendelea kuchangia ili watoto hao waendeshe maisha ya kawaida.

Naye Mratibu wa Mashirika ya Umoja Mataifa yaliyopo nchini, Alvaro Rodrigues amesema kwamba Umoja wa Mataifa utaendelea kusaidia kituo hicho na kuwataka wanaotunzwa hapo kutoacha kuishi kama watoto kwani ndio tunu waliyonayo kwa sasa.

Aidha alisema kwamba anauchukua wimbo waliouimba ambao unazungumzia machungu ya maisha yao na kwenda kuwaeleza watu wengine ili nao washiriki katika kubadilisha hali ya kuogofisha na kuleta usalama.

Mkurugenzi Mtendaji wa shirika la UNDER THE SAME SUN, Vicky Ntetema alijumuika kwenye mazungumzo hayo. Pichani akifafanua jambo kwa Mratibu Mkazi wa mashirika ya Umoja wa Mataifa na mwakilishi wa Shirika la Maendeleo la Umoja wa Mataifa (UNDP) nchini, Alvaro Rodriguez (hayupo pichani) kuhusiana na changamoto mbalimbali zinazowakabili watu wenye ulemavu wa ngozi nchini.

Alisema wao (UN) wamefika katika kituo hicho kuona watoto wanavyoishi na watafanya nini kuwasaidia. Aliwataka Watanzania kuhakikisha wanakomesha machungu ya albino hao na kuishi nao kama watu wengine wa kawaida. Aidha Mratibu huyo alipata nafasi ya kuzungumza na Binti wa miaka 19 Masabu masuka ambaye amejifungua mwaka jana kituoni hapo bila msaada wa wauguzi baada ya kulazimika kuondoka kwao akiwa mjamzito kukwepa mauaji dhidi ya albino yaliyofanyika Mei mwaka jana wilayani Bariadi. Binti huyo alifika kituoni hapo na kaka zake watatu ambao wote ni maalbino kama yeye.

Mkuu wa wilaya ya Shinyanga, Bi Anne Rose Nyamubi katika picha ya pamoja na ugeni kutoka ofisi za Umoja wa Mataifa Tanzania na Shirika la UNDER THE SAME SUN.

Mkuu wa wilaya ya Shinyanga, Bi Anne Rose Nyamubi akiwasalimia watoto wenye ulemavu wa ngozi wanaolelewa kwenye kituo cha Buhangija Jumuishi kilichopo mkoani Shinyanga kabla ya kumtambulisha Mratibu Mkazi wa mashirika ya Umoja wa Mataifa na mwakilishi wa Shirika la Maendeleo la Umoja wa Mataifa (UNDP) nchini, Alvaro Rodriguez (hayupo pichani).

Mratibu Mkazi wa mashirika ya Umoja wa Mataifa na mwakilishi wa Shirika la Maendeleo la Umoja wa Mataifa (UNDP) nchini, Alvaro Rodriguez (kulia) akizungumza na watoto wenye ulemavu wakiwemo wa ngozi (hawapo pichani) wanaolelewa kwenye kituo cha Buhangija Jumuishi kilichopo mkoani Shinyanga alipofanya ziara ya kutembelea kituo hicho. Katikati ni Mtaalam wa Mahusiano na Mawasiliano wa Umoja wa Mataifa (UN) Tanzania Hoyce Temu na kushoto ni Mkuu wa wilaya ya Shinyanga, Bi. Anne Rose Nyamubi.

Mratibu Mkazi wa mashirika ya Umoja wa Mataifa na mwakilishi wa Shirika la Maendeleo la Umoja wa Mataifa (UNDP) nchini, Alvaro Rodriguez akitoa zawadi ya maziwa kwa watoto wenye ulemavu wa ngozi wanaolelewa kwenye kituo cha Buhangija Jumuishi kilichopo mkoani Shinyanga.